МЭНДЧИЛГЭЭ

Соёлын Төв Өргөөний он жилийн түүхийг бүтээлцэж, хамтран ажиллаж ирсэн хамт олон, ажилтан, албан хаагч, ахмадууд, уран бүтээлчид, тэдний гэр бүл, та бүхэндээ БАЯРЫН МЭНДЧИЛГЭЭ дэвшүүлж, бидний үйл ажиллагааг хүндэтгэж, бүх талын дэмжлэг үзүүлж, хамтран ажиллаж ирсэн Нийслэлийн Иргэдийн Төлөөлөгчдийн Хурлын дарга, төлөөлөгчид, Нийслэлийн Засаг дарга бөгөөд Улаанбаатар хотын захирагч, Тамгын газар, Захирагчийн ажлын алба, Боловсрол, Соёл, Шинжлэх ухаан, Спортын яам, бусад байгууллага, хувь хүмүүст чин сэтгэлийн ТАЛАРХАЛ илэрхийлье!

Өргөөг маань Зөвлөлтийн ард түмний халуун сэтгэлийн хандиваар сүндэрлүүлэн Монгол түмэнд 1988 онд бэлэглэсэн түүхэн өдрөөс хойш соёл, урлагийн хөгжилд өөрсдийн хувь нэмрээ оруулан үйлчилгээний хүртээмжийг нэмэгдүүлж гадаад харилцаа, хамтын ажиллагааг өргөжүүлэн, үзэгч олон түмэндээ халуун дотно сэтгэлээр үйлчилж, итгэлийг нь хүлээж, амжилттай ажиллаж байна.

Түүхэн хугацаанд хамт олныхоо нөр их хөдөлмөр, хамтран ажилладаг та бүхнийхээ дэмжлэгээр орчин цагийн хөгжилтэй хөл нийлүүлэн алхаж, эдүгээ “Соёл урлаг, шинжлэх ухаан, эдийн засаг, нийгмийн хөгжлийн олон талт арга хэмжээ зохион байгуулдаг, үе үеийнхний уран бүтээлчдийн хөгжин дэвждэг, урлаг соёл, дуу хуур, амжилт бүтээлийн дээжсээр ард түмнээ цэнгүүлдэг, “Нийслэлийн соёл урлаг, оюун ухааны гэгээрлийн төв” нь болон хөгжиж ирлээ.

Цаашдаа ч олон түмнийхээ хүндлэлийг хүлээж, улсынхаа нэрийг дэлхийн зулайд цэнгүүлсэн гайхамшигтай уран бүтээлчдийг төрүүлсэн, үйлчилгээний чанараар тэргүүлсэн, ариун үйлсийн голомт байсаар байх болно.

Нийслэлийн Соёлын Төв Өргөөний захирал,
МУУГЗ Бадамын Байгалмаа